Орага манфаат кирса…
САВОЛ: Худога, динга ишонганини пеш қилиш ҳам сиёсат эмас-ми? (Назира).
ЖАВОБ: Аслида ҳамма нарсанинг сиёсий томонлари бўлади. Ҳатто нафас олиш ҳам сиёсат бўлиши мумкин. Агар унинг ортида қандайдир манфаат бекинган бўлса.
Худога ишониш масаласига келганда кимнинг қай даражада ишонишини Худонинг ўзи билади. Бу хусусда бандалари ҳакамлик қилиш ваколатига эга эмас. Шундай экан, “Мен бу қадар ишонаман, сен эса у қадар” дейиш ҳам Худонинг ваколатига шериклик қилиш, яъни шак келтириш демакдир. Аммо бу масалани сиёсий мақсадларда қўлланувчиларга бунинг фарқи йўқ. Улар ўзларини ҳаками мутлоқ деб ҳисоблайдилар ва ҳатто бир бегуноҳни ҳам динсиз деб ҳукм чиқараверадилар.
Бир ривоят ёдимга тушди. Бандалардан бири ҳар куни ибодатларини вақтида қилар ва бошқа фарзларни ҳам қоидаси билан адо этар экан, аммо қўшниси бепарво, ўз иши билан банд. Ибодатгўй ҳар куни қўшнисига дакки бериб, “Сен Худога ишонмайсан” дер ва бу гапини маҳалла кўйда ҳам такрорлаб “Мен ибодатимни вақтида қиламан, фалончи эса қилмайди” дер экан. Улар ўлганларидан кейин уламолардан бири, “Ҳар ҳолда ибодатгўй жазосини олган бўлса керак?’ дебди. Унинг бу гапига ҳайрон бўлишибди. Шунда фозил киши: “У Худога ишонишини сиёсатга айлантирган эди-да. Агар вақтида ибодат қилса, бу, жумладан, Худодан ўзининг гуноҳларини авф этишни сўраш, у дунёдан яхшироқ жой олиш учун интилишдир, яъни мутлоқ ўзи билан боғлиқ вазият. Бу ҳар кимнинг ҳаққи. Аммо буни пеш қилиб, қўшнисини айблагани билан гуноҳга ботди” деган экан.
Бу бир ривоят. Лекин бир киши Худога ишонганини, динга ишонганини пеш қилиб, амалда одамларга ёмонлик раво кўрса, иғво бўҳтонларга замин яратса, яхшиликнинг кўчасидан ўтмаса, фақат ўзини ўйласа ва бошқаларни Худога ишонмайдиган деб билса, у одамнинг сиёсий, оний манфаатлари бордир. Яхшилаб ўрганиб чиқсангиз у ўтмишда Худога қарши чиққан бўлиши ва келажакда яна шу йўлига қайтиши ёки акси ҳам бўлиши мумкин. Чунки манфаат одамни турли куйларга солади. Орага манфаат кирганда самимийлик йўқолади.
Хуллас, назаримда Худога, динга ишонганини пеш қилавериш каттагина сиёсатдир.
Жаҳонгир Маматов,
“Зеҳният жумбоғи”(2004) китобидан.
Filed under: Kundalik, Savol-Javob | Tagged: Jahongir Mamatov |
Jahonnoma 
Assalomu alaykum Jahongir aka.Sog’-salomat bormisiz.Oila a’zolaringiz ham yaxshi yurishibdimi
.Shu fikrlaringizga mutlaqo qo’shilaman.Buni hayotda isbotini ham ko’p ko’raman.Allohning ishlariga aralashmaslik kerak.
Aql odamga berilgan tug’ma qobiliyatdir.Shu qobiliyatni yuksaklikka shakllantirish ilm orqali bo’ladi,albatta.Men fikr-mulohazalaringizni o’qiymanda, hayron qolaman.Shunchalik ham aqlli,uzoqni xatosiz ko’ra oladigan ya’ni bu dunyoning barcha qorong’u va yorug’ yo’llaridan boxabar odam ham bo’larkanda, deb o’ylanib qolaman.Albatta,bu bilimingiz, kuzatuvchanligingiz va ziyrakligingizning hosilasi bo’lsa kerak ,deb o’ylayman.Ko’z tegmasin.
Siz mening bolalik xotiralarimdan chuqur joy olgan insonsiz.Qisqacha qilib aytganda kumirimsiz!
Men doim sizga o’xshashga harakat qilaman.To’g’riso’zligingizni qadrlayman.Esingizda bo’lsa sizni tasodifan yana qaytadan topib olganimdan shodlanib izoh yozgandim.Shu o’rinda sizni topishimga sababchi bo’lgan Zamondosh saytiga tashakkur aytaman.Meni o’zimning emas,oddiy xalqning kelajagi ko’proq tashvishga soladi.
Men ham shu xalqning bir parchasiman.
Sizni va safdoshlaringizni Vatanda taniydigan va hurmat qiladigan insonlar juda ko’p ekan.Faqat ular bu haqda gapirish mavridi bo’lmagani uchun indashmas ekan.Amin bo’ldim-ki,oqil va dono odamlarni uncha-munchaga odamlar unutishmas ekan.
Bir oqil kishi sizlar haqingizda aytib qoldi.”Karimov o’sha sostavni hukumatdan ketkazib bekor qildi.Hozirgacha yonida bo’lib ishlab ketganlardan ko’ra,o’shalar sadoqatliroq bo’lardi” dedi.Islom Karimov ham inson ,hamma kabi xato qiladi.Men prezidentimizning yaxshi sifatlari ham borligini eslatib o’tmoqchiman.
Jahongashta Jahongir akam, bu gaplarga siz qanday qo’simchalar qilgan bo’lar edingiz?
Siz va safdoshlaringizni hukumatdan ketkazgani uchun I.Karimovda pushaymonlik hissi bo’lmaganmikan? Bu haqda fikringiz qanday? Umringiz uzoq va barakatli bo’lsin.Yaratgandan sizga va oila-a’zolaringizga jumladan xalqimizga ham tinchlik-xotirjamlik va barcha ezgu niyatlarimni tilab qolaman.Hurmat bilan muxlisangiz Muslima .