Jahonnoma

Сиёсий сатира

19. Ит-бит

“Катта” Божхона бошлиғининг ҳисботига назар солиб, ундан сўради׃

-Хўш, бу ишлар яхши, лекин айтингчи, ўғлим, йил бошидан бери қанча контрабанда маҳсулотларини ушлаб қолдингиз?

-Анча-бунча ушладик,-деди божгир “Катта”нинг ўғлим деганидан севиниб.-Пулга чақсак, олтмиш миллион доллардан ошадиёв…

-Ўша олтмиш миллион доллар қаёққа кетди?

-Фойизи билан олтмиш икки қилиб, хазинага топширдик.

-Ўзимизнинг хазинагами?

-Албаттада, отахон!

-Яхши…яхши… Дарвоқе, ундан олдинги йил контрабанда маҳсулотларидан қанча ушлаган эдинглар?

-Жуда оз… Ҳужжатларда деярли нолга тенг. Аслида-ку илгари ҳам шу атрофда кирарди.

“Катта” божгирга муғомбирона жилмайиш қилди׃

-Қизиқ? Нима ўзгарди? Қонунларми? Қоидаларми? Божхонами? Котрабандачиларми? Ёки қорин тўйиб қолдими? Нега бирдан хазинага бунча кирим қилдингиз, ўғлим?

-Илгари божимиз божгир эдилар, бож-хирожни ўзлари бошқарардилар. Шунинг учун..

-Божамиз дедингизми? Божангиз ким?

-Йў… йўў.. Узр, божимиз дедим, синглимиз дегани.

-Синглингиз нима қилади бу ишларга аралашиб?

-Ўзингиз жиловларини тортиб қўйдингиз, энди аралаша олмасалар керак. Синглимиз-қизингизда…

-Ҳмм…Қизим қандай қилиб сизга сингил бўлади?

-Сиз отамиз бўлгандан кейин, у киши синглимизда энди…

-Ундай бўлса… Синглингиз шунча ишни қилибди, сиз қаёққа қарадингиз? Кўзингиз қаерда эди, ит-битдамиди?

– Йў… йў…Худди мана шу, ҳозиргидек ҳолда эдим, ит-битга тикка қаролмас даражада эдим,- дея кўзларини ерга қадади Божхона бошлиғи.

ЖМ

Filed under: Оқсарой ҳангомалари | Tagged: Oqsaroy |