Jahonnoma

Оқсаройнинг сўз ўйинлари

18. Сариғи

-Нега бизнинг олтинларимиз ҳақида гапириб қолишди яна?- деб сўради “Катта” маслаҳатчидан.-Август ойидаги гап қандай қилиб бунча тез ўртага чиқиб қолди?

-Олмониянинг “Gold Reporter” деган нашри бор экан, ўша Швейцария Август ойида фалон тоннадан кўпроқ олтин импорт қилди, шунинг фалон фоизи Ўзбекистондан деб ёзгандан кейин гаплар болалаб кетди,-деди маслаҳатчи гуноҳкорона талпиниб.

-Биз бор йўғи йигирма тоннадан ошиқроқ олтин жўнатдик, бу бор йўғи бир миллиардгина франк бўларкан. Шунга шунча ойболта мойболта бўлдими? Дунёнинг иши шунақа, терговга ишинг тушдими, бир нарса узатишинг керак. Нима қилайлик, гапга кирмади, жазоладик. Энди чет элга кетаман деб туриб олган.

-Ҳа, Швейцария терговчилари иш очиб, келсин, ўзимиз сўроқ қиламиз, деб остонангизни ялаб ўтиришибди.

-Улар ялашга уста экан… Хўш, нима қилиш керак? Ялатавериш керакми? Шундай дейману лекин Совет даврида ҳам Московнинг Госпланига қуруғидан олиб бормасанг, иш битмасди. Терговини қўявер! Сариғидан олмаса ишни ёпмасди,-деди “Катта” қайғуга ботиб.

Маслаҳатчи унга далда бўлди׃

-Булар ҳам Московдан ўрганга ўхшайди. Ариғини сариғи билан очадиган. Мажбуран юбордик-да, ўйлайвериб ўзингизни қийнаманг.

-Эҳ, ука, олиб ўрганган қўлнинг бериши осон эмас. Жигарингни бир парчаси узилгандек, гўрингни бир парчасини бузилгандек бўлади. Шунга қарамай узатдик. Камлик қилганга ўхшайдики, дунёга жар солишибди. Бу аҳволда қизимни у ерга жўнатсак, лаппи этиб қамаб қўймасмикан?

-Қуруқ жўнатмаймиз. Сиққанича юклаймиз яна. Бошингиздан садақа. Бош омон қолсин, қизингиз ўша ерни истаётган бўлса, оқ йўқ тиланг, бора қолсин. Етмаса яна юборамиз!

-Тилгинаси қурсин! Талини тийсаку шу олтинларнинг ҳаммаси уники эди. Ана сариғи тилини тийиб ўтирибди, остонаси олтиндан.

-Бунисининг сариғи қолмади, амммо иккита сағири ҳам бор…

-Ҳа, нима бўлганда ҳам фарзанд, мендан кейин қамоқларда чириб кетмасин дейманда.

“Катта” маюс кўзларини маслаҳатчига қадади. Маслаҳатчи шу дамда уни қучоқлаб йиғлашга тайёр одамдек чин дилдан гапирди׃

-Худо хохласа, чиритмаймиз…

ЖМ

Filed under: Оқсарой ҳангомалари | Tagged: Oqsaroy |