MUROJAATI
Turkiy davlatlar prezidentlari, parlamentlari, siyosiy partiyalari va muxolifat kuchlari e’tiboriga
Biz, Birlashgan O‘zbek Muxolifati, bugungi murakkab va tez o‘zgarayotgan geosiyosiy sharoitda Turkiy davlatlar mintaqasida yashayotgan xalqlarning xavfsizligi, suvereniteti va tarixiy kelajagi yuzasidan chuqur mas’uliyat va tashvish bilan Sizlarga murojaat qilamiz.
So‘nggi yillarda dunyoda kuchlar muvozanati keskin o‘zgarib bormoqda. Imperiyaviy tafakkurdan voz kechmagan ayrim markazlar mustaqil davlatlar suverenitetini ochiqchasiga shubha ostiga qo‘ymoqda. Markaziy Osiyo va kengroq ma’noda Turkiy makon bugun nafaqat iqtisodiy va siyosiy, balki mafkuraviy va axborot bosimi ostida qolmoqda.
Bugun biz faxr bilan Turon deb ataydigan mintaqada yashayotgan xalqlar ertangi kun haqida xavotirda. Bu xavotir faqat tashqi tahdidlardan emas, balki Turkiy davlatlar o‘rtasidagi integratsiyaning sustligi, umumiy strategik qarash va institutsional birdamlikning yetishmasligidan ham kelib chiqmoqda.
Tarix va zamonaviy siyosiy tajriba shuni ko‘rsatadiki, alohida-alohida harakat qilayotgan davlatlar global beqarorlik sharoitida zaiflashadi. Aksincha, aniq huquqiy va siyosiy asosga ega bo‘lgan mintaqaviy ittifoqlar xalqlarni himoya qiladi, taraqqiyotni tezlashtiradi va suverenitetni mustahkamlaydi.
Shu bois biz Turkiy davlatlar yetakchilarini, qonun chiqaruvchi organlarini, siyosiy partiyalarini va muxolifat kuchlarini integratsiya jarayonlariga nisbatan ehtiyotkorlik emas, balki tarixiy mas’uliyat bilan yondashishga chaqiramiz.
Xususan, quyidagi yo‘nalishlarda amaliy va siyosiy qarorlar qabul qilinishi zarur, deb hisoblaymiz:
- Turkiy davlatlar hududini o‘zaro erkin iqtisodiy makon sifatida tan olish va iqtisodiy to‘siqlarni bosqichma-bosqich bartaraf etish;
- Alifbo birligi masalasini madaniy tashabbus darajasidan davlat siyosati darajasiga ko‘tarish va bu borada aniq huquqiy mexanizmlarni joriy etish;
- Kollektiv xavfsizlik tamoyilini shakllantirish – bir Turkiy davlatga qilingan tajovuz butun Turkiy makonga qilingan tajovuz sifatida baholanishi lozim;
- Pasport va pul birligi masalalarida huquqiy uyg‘unlashuv sari harakat qilish, bu borada jamoatchilik muhokamalari va referendumlar o‘tkazish imkoniyatlarini ko‘rib chiqish;
- Yagona axborot makonini yaratish, Turkiy xalqlarni tashqi mafkuraviy va propagandaviy ta’sirdan himoya qilish, mintaqaga nisbatan dushmanona mazmundagi axborot oqimlarini cheklash bo‘yicha muvofiqlashtirilgan siyosat yuritish.
Biz ushbu murojaatni hech bir davlatga qarshi emas, balki Turkiy xalqlarning o‘z taqdirini o‘zi belgilash huquqi, tinchligi va barqaror kelajagi yo‘lida bildirayotganimizni alohida ta’kidlaymiz.
Bugun qaror qabul qilish vaqti. Ertaga kech bo‘lishi mumkin.
Tarix sukut qilganlarni emas, mas’uliyatni zimmasiga olganlarni eslaydi.
Ezgu niyatlar bilan,
BIRLASHGAN O‘ZBEK MUXOLIFATI
Filed under: Kundalik | Leave a comment »
Jahonnoma 