Jahonnoma

Оқсаройнинг сўз ўйинлари

27. Таъсир

“Катта” ҳузурига келган муфтий билан суҳбат қурди.

-Ука, чин юракдан табриклайман, “Дунёнинг энг таъсирли 500 мусулмони” рўйхатига кирибсиз, деб эшитдим.

-Қуллуқ, отахон, қуллуқ!-деди муфтий ўрнидан туриб.

-Ўтиринг, ўтираверинг, ука. Ким эълон қилибди бу рўйхатни ўзи?

-Уммони моликдаги исломий тадқиқотлар маркази, отахон.

-Ҳмм.. Биринчи ўринни кимга берибди?

-Биринчи ўринни Саудия қиролига, иккинчиси бир нотаниш шайхга, учинчи ўрин эса оятулло Ҳумайнийга.

-Хайрият ҳам мани киритишмабди. Гала галварслар орасида қоларканман.

-Ўтган йилги рўйхатда бор эдингиз. Бу йил Туркманбошини лойиқ кўришибди.

-Нега у паланги лойиқ бўлади?

-У муфтий-имомларига кўпроқ таъсир қилиб, одамларни ҳақиқий дин йўлига чорлаганмиш. Адашганларни териб олганмиш. Бу ишни сиз олдинроқ бажаргандингиз. Лекин уларнинг муфтийси ҳали бери бу рўйхатга кира олмайди.

-Балки келаси йил кириб қолар. Палангидан кейин пасанги ҳам кираверади.

-Киролмайди, отахон, киролмайди. Чунки у Туркманбошига умуман таъсир қила олмайди. Турманбоши тажанги таранг. Уни ишлатиб жоме қурдиртириш, тез-тез мачитларга олиб бориш, стулда ўтқазиб бўлсада намоз ўқитиш, ҳар икки гапнинг бирида “Оллоҳ, Оллоҳ” дедириш унинг қўлидан келмайди, – деди муфти соқолини силаб.

Нофизий.

Filed under: Оқсарой ҳангомалари | Tagged: muftiy |