Jahonnoma

Оқсаройнинг сўз ўйинлари

26. Хизмат

“Катта” нинг қабулига ”ишловдан чиққан” бир тенқурини олиб киришди. Ачом-қучоқ, мақта-мақтадан кейин “Катта” уни саволга тутди.

-Аҳвол қалай, биродар?

-Ўтган йилгидан анча яхши.

-Свет ўчмаятими?

-Ўтган йилга нисбатан бу йил тинчмиз. Ўтган йили кун ора ўчавериб сил қилганди, бу йил ҳарна шу балодан қутулдик.  Кўп яхши томонлари бор, эрта ётиб эрта турамиз. Сабил қолгур нега ўчди, ана ўчди, мана ўчди деган гаплардан қутулдик. Ота-боболаримиздек шод-хурраммиз.

-Газ борми, газ?

-Газга қолган кун асло қолмасин! Ўзимизнинг илдизимиздан қўймасин! Шу десангиз “тезгаз” деган нарса чиқди. Жуда қулай! Истаган одам ўзи тайёрласа бўлади. “Тап-тап” деворга уриб чиқасиз бўлди. Бунга ҳам кунимиз қолмаган. Кампирим у ёқдан, бу ёқдан териб келади. Шукур, молимиз лойга ботди, қўлимиз мойга ботди, деган гап бору…  Печкамиз-печ ака, гур-гур ёнгани ёнган! Илоё “тезгаз”дан узмасин!

-Узмайди, узишга қўямиз-ми? Бу ерда биз нима учун ишлаб ўтирибмиз?

-Раҳмат, раҳмат. Илоё  қишдан чиқайлик, ишдан чиқмайлик, омин!

-Омин! Ҳа, яшанг, бозорлар қандай?

-Бозору мозор деганлар! Эскилари қолмади. Ўт тушди барига. Янгиси ял-ял ялло. Ана бозору мана бозор. Истаган нарсангиз бор. Кирсангиз, кўзингиз  қиз боладай ўйнаб кетади. Живир-живир. Умрингизда кўрмаган нарсаларни кўрасиз. Жаннатнинг ўзгинаси. Томоша қилишдан чарчамайсиз. Кўз тўйсин экан, кўз!

-Пенсия қалай? Етаяптими?

-Пенсия дедингиз-ми?

-Ҳа, нафақа! Олиб турибсизми?

-Раҳмат! Нафақадан хафақа қолмади. Шарофатингиз билан! Худога минг қатла шукур, шу кунларга ҳам етказди! Бу ёққа келишимдан олдин ҳокимбуванинг ўзи сўз берди. Ана ҳурмату мана ҳурмат! Қуллуқ сизга!

-Хўш, бизга хизмат борми?

-Қиттайгина хизмат бору, айтма дейишганда аммо…

-Тортинманг, айтаверинг…

-Шу денг, болалар кетиб-кетиб қолди. Нон излаб кетган-да! Нима қила олардик? Ўзингиз ҳам отасиз, ўзингиздан қолар гап йўқ.  Агар имконингиз кўтарса, икки қатм кафанлик истаган бўлардим. Кампирим билан ўлигимиз хор бўлмасин дейманда…

-Бўлди-бўлди,  шу ҳам хизматми? Қачон ўлмоқчисиз?

Нофизий.

Filed under: Оқсарой ҳангомалари | Tagged: nofiizy |