Jahonnoma

Оқсаройнинг сўз ўйинлари

22. Илик

-Отахон, боя ана у радиодагиларнинг олдига суяк ташлашга одам топинглар, дегандингиз, биттасини топдик, қабулхонада эди,-деди маслаҳатчи ”Катта”га.

-Ичкарига киритиб юборинг, ўзим гаплашaман,-деди “Катта”.

Пакана, қориндор одам липиллаб кириб келди. Салом-аликдан кейин “Катта” унга:

-Ана у радио бору… ҳамма нарсани гапираверадиган?! Этик деган нарсани билишмайди,-деб гапни узоқдан бошлади.

-Йўғе, этиксиз ҳам бўладими? Этиклари бордур? Фақат қиш келганда, қор кўпроқ ёққанда кийсалар керак-да?-деди ҳалиги одам самимий оҳангда.

-Укажон, этикмас этика! Одамни тилидан ушламангда!

-Отахон, биз фақат молни тилидан ушлаймиз, у ҳам жони чиқаётганда. Ҳаром ўлмасин, деймиз. Қурбон байрамида кўрган бўлсангиз керак?

-Ишқилиб байрамга оқ қалпоқчангиз билан чиқмаганмидингиз? Нима гап ўзи? Ман илик десам, сиз пилик дейсиз, тинка десам, батинка дейсиз? Бу нарсаларнинг фарқини биласизми ўзи?

-Биламан, қалпоқча бошга, батинка оёққа отахон, биламан! Тинка қуриса оёқ терламайди, алоқаси шу.

“Катта”нинг авзойи бузилди:

-Ука, сизда калла деган нарса борми ўзи?

-Калла қолмаган. Бунинг устига калла иликсиз, илик эса суякда бўлади. Бугун суягимиз ҳам қолмадиёв…

-Нима, сиз қассоб бўлиб ишлаганми?

-Ҳа-да, қассобман! Чақиртирибсиз, бозордан олиб келишди ғириллатиб. Қурбонлик ётқизилса керак, деб ўйлагандим.

“Катта” бошини ушлаб:

-Ҳа, Худойим-а?! Битта қасоб-массоб топинглар, ана у радиодаги этиксизларнинг олдига суяк-пуяк ташласин, дегандим…,-деди.

-Лекин ман суякни ташламайман, отахон! Ундан қўлбола шўрва қиламан. Бир марта ичсангиз қайта-қайта ичаверасиз, то суягидан илигини қоқиб олгунча. Эшитишимча, суякдан иликни  қоқиб олишда сизга тенг келадигани йўқ экан.

-Бўлди, бас қилинг майнавозчиликни, қани чиқинг хонадан, бу кетишда илигимни қоқиб оласиз!

-Йўғе, отахон, молники турганда сизникини нима қиламиз, молники тоза!

Нофизий.

Filed under: Оқсарой ҳангомалари |