Jahonnoma

ТАНГРИНИНГ ГЎЗАЛ ИСМЛАРИГА МУНОЖОТ

(Давоми)

БАШИР

Ё, Башир! Савобу гуноҳим ўзингга аён,
Ё, Башир! Яшириб ёзсам-да сен учун баён,
Ё, Башир! Дунёлар мулкида ғолибсан-шоён,
Ё, Башир! Сендан қоча-қоча кетарман қаён!

ҲАКАМ

Ё, Ҳакам! Ҳақиқат изладим дорул фанода,
Ё, Ҳакам! Кўзларим боғланиб гули раънода,
Ё, Ҳакам! Билмадим адолат асли маънода,
Ё, Ҳакам! Сенинг амрингдаман, боқий самода!

ОДИЛ

Ё, Одил! Қайга борсам кўрдим юраклар яро,
Ё, Одил! Ёна-ёна қирмизи қоним қаро,
Ё, Одил! Ўзинг шавқат фармонини ўқигил,
Ё, Одил! Бош тутайлик одилсизликлар аро!

ЛАТИФ

Умри дароз, ризқу фароғ  бер, ё, Латиф,
Зулмат аро йўлда чароғ  бер, ё, Латиф,
Насибамни майда-майда тергали,
Ўзинг қадоқ қўлга яроғ  бер, ё, Латиф!

ХАБАР

Гуноҳ қилдик кундузлари, қора парда- девор қилдинг, ё, Хабар,
Гуноҳ қилдик биз тунлари, Хуршид ила ошкор қилдинг, ё, Хабар,
Қаҳринг Сенинг раҳминг экан, раҳминг огоҳ этгувчи сас,
Билмаганни охиратда тилим-тилим, абгор қилдинг, ё, Хабар!

ҲАЛИМ

Ё, Ҳалим, кўнглима шавқатни сол,
Ё, Ҳалим, йўлима ҳурқатни сол,
Гуҳоҳ этсам марҳаматинг аяма,
Ё, Ҳалим, умрима шавкатни сол!

АЗИМ

Уммон зарра, Сен азимсан, ё, Азим,
Осмон зарра, Сен азимсан, ё, Азим,
Мен милт этган учқундирман, ё, Азим,
Жаҳон зарра, Сен азимсан, ё, Азим!

ҒАФУР

Бу дунёнинг ҳар куни нур-ёз эмас, ё, Ғафур,
Адолатсиз шотилари хўп соз эмас, ё, Ғафур,
Синовингда билиб-билмай йиқилдим,
Махфират қил, гуноҳларим кўп, оз эмас, ё, Ғафур!

ШОКИР

Шукр Сенга, бандага қул бўлмадим, ё, Шокир,
Шукр Сенга, ниҳол экан сўлмадим, ё, Шокир,
Неъматингни ҳар лаҳзада ҳис этдим, ё, Шокир,
Шукр Сенга, ўлиб туриб, ўлмадим, ё, Шокир!

ОЛИ

Аркинг аркида йўқдирки адад, ё, Оли,
Қўлни очсак ўзинг мадад, ё, Оли,
Қиёс излаб қиёсингни топмадим,
Олий Сенсан, олий абад, ё, Оли!

1966 йил. “Нурнома” китобидан.

ЖМ

(Давоми бор).

Filed under: she'rlar |