Jahonnoma

Яхшилик аслида сўлим бир баҳор

Эртанги кунингдан қўрқсанг дўст, магар,
Дарҳол ортга қайтгин олган йўлингдан.
Бугун бир нарсалар қилмасанг агар,
Эртага ҳеч нарса келмас қўлингдан.
ХХХ
Юлдузлар жилмасмиш, юрмагай осмон,
Қуёш ҳам на сайёҳ, на кезар камон.
Бизни алдабдилар асрлар бўйи,
Магар одамзотдир саргардон ҳамон.
ХХХ
Сен менга жаннатдан гапирма эй шоҳ,
Калити қўлингда бўлса ҳам магар.
Менинг юрагимда яшаган илоҳ,
Дўзахга юборса юборсин агар!
XXX
Сенинг фалсафангла дунёга боқсам,
Ҳар оним, ҳар сўзим- ҳар қадам-гуноҳ.
Дўзахга кирибда ўзимни ёқсам,
Барибир дастингдан қутулмам гумроҳ!
XXX
Шодмон кўрмоқликни истаб ҳар доим,
Қанча уринмайин қилмас кифоят,
Мени дўзахингга отгин Худойим,
Мамнун бўлар шунда рақибим шояд.
ХХХ
Сени гувоҳликка ким чорлай олар,
Ахир Ҳақиқатдан қўрқасан ўзинг?!
Тилинг танглайингга ёпишиб қолар,
Олий маҳкамада чиқмагай сўзинг!
ХХХ
Йил кетиб, йил келар, севинамиз биз,
Осмон эса кўз ёш тўкади.
Ер кетиб, ер келар, тепинамиз биз,
Баҳор эса кўчат экади.
ХХХ
Золим эрур Бугун, қиличи ҳам қон,
Ҳатто кўкка сиғмас фиғону ноланг.
Бугунни унутсанг, Эртага ишон,
Эртанинг қўнглида яшнайди боланг.
XXX
Дунё бугун келибдими дунёга,
У кўпни қаритган, ўлмас бир даҳо.
Ишониб қолганмиз бу гап- рўёга,
У асли ўлжасин маст этган юҳо!
ХХX
“Исён!” деб бировга суқмасман сўзим,
Ҳатто чумолининг умри ҳам азиз.
Мен исён қиламан ўзимга ўзим,
Ўзимни енгмоғлик зафардир ҳаргиз.
ХХХ
Дерлар ёзилганмиш тақдири инсон,
Эргашиб юрармиш ошини ошлаб.
Мен эса бузибман буни ногаҳон,
Тақдирни ортимдан юрибман бошлаб.
ХХХ
Дарахтнинг илдизи, қомати муҳим,
Шуларсиз ҳосилнинг униши қийин.
Инсонда илдиз ҳам, қомат ҳам муқим,
Лек ақл етмаса, бари бир тийин.
ХХХ
Яхшилик аслида сўлим бир баҳор,
Дўсту биродарга қилки, қайтажак!
Магар унутди деб ранжима, зинҳор,
Қиш сени эзса у сўзин айтажак!
ХХХ
Ўқ бўлгин, мушак бўл, аммо мақтай бил,
Бит бўлгин, пишак бўл, аммо мақтай бил,
Мақтаган буюкмиш, мақтамас куюк,
Ит бўлгин, эшак бўл, аммо мақтай бил.

ЖМ.

Filed under: she'rlar |