НАВРЎЗ МУБОРАК !
Ҳей, оғир кун ҳам Аллоҳини ўйлаган,
Ҳей, ёлғон эмас, рост сўзини сўйлаган,
Ҳей, зардоб ютиб курашини қўймаган,
Диллар
Назрўз муборак сизга!
Ҳей, мансаб учун дўст ёрини сотмаган,
Ҳей, қабоҳатнинг ботқоғига ботмаган,
Ҳей, Ватаним деб кечалари ётмаган,
Диллар
Наврўз муборак сизга!
ЯХШИЯМКИ…
Оғоч бўлсанг йиқилардинг
Болталарнинг зарбидан,
Ўрду эсанг безиллардинг
Ёғийларнинг ҳарбидан,
Элат бўлсанг қувилардинг
Шарқидану Ғарбидан,
Яхшиямки, сен байрамсан, Наврўзим!
Осмон бўлсанг қалдироқлар
Юлар эди қошингни,
Хирмон бўлсанг қора зоғлар
Кўмар эди чошингни,
Инсон бўлсанг туҳмат тоши
Ёрар эди бошингни,
Яхшиямки сен байрамсан, Наврўзим!
***
ҚОР ОСТИДА…
Қор остида ухлаган
Замин сўлғоқда бугун,
Оғочида мудраган
Куртак тўлғоқда бугун,
Музлаб ётган ирмоқлар
Уммон чўлғоқда бугун,
Наврўз кириб келса ҳам
Қўллар боғлоқда бугун.
Майсанинг япроғидан
Шабнам сизламас бугун,
Лола гул титроғида
Баҳор музламас бугун,
Қаҳри қаттол кимсадан
Омад тизламас бугун,
Наврўз кўчама-кўча
Душман изламас бугун.
Соғинч қиличи ёмон
Тилкалар тошни бугун,
Зулм хасталик асли
Кемирар бошни бугун,
Оналари йиғласа
Ким тутар ёшни бугун,
Наврўз мўйқалам олиб
Чизмагай қошни бугун.
Сумалакни қайнатган
Қозон қорадир бугун,
Иймонларни уйғотган
Азон ародир бугун,
Миллатини суйганлар
Сарсон сародир бугун,
Наврўз ҳам менинг каби
Бағри яродир бугун.
Filed under: Kundalik |
Jahonnoma 
assalamu alaykum hurmatli Jahongir aka! Yangi kun va yangi quvonchlar doimo hamrohingiz bo’lsin. Ijodlarga omad. Hurmat bilan
Ming rahmat. Erkinlikning erkin o’g’li bo’lish baxti aslo Sizni tark etmasin!
Assalomu alaykum Jahongir aka.Boringizga shukur.Allohim umringizni Navròzdek barhayot qilsin.
Rahmatlarim. Buyuk Tangirm sizga go’zal va saodatli kunlarni davomli-doimiy qilsin.
Assalomu alaykum Jahongir aka Navròz sizga ham muborak bòlsin.Boringizga shukur.Sizga barcha ezgu tilaklarni tilayman.
Hurmatli Jahongir aka,Jahonnomani katta qiziqish bilan goh kulib,goh yig’lab òqib borayapman.Inson hayoti mana shunaqa sinovlardan iborat ekan-da.Òzimning jahongashta Jahongir akam,umringizga umr qòshilsin,ilohim.Mening bolalik xotiralarimda, siz chin insoniy fazilatlaringiz bilan ijobiy taassurot qoldirgansiz.Sizni yana topib olganimdan benihoya shodman! Eslasam,endi òzimga g’alati tuyulib,òzimning soddaligimdan mazza qilib kulayapman.Men sizni vafot etgan deb eshitib,esimga tushgan paytingizda haqqingizga duo ham òqib qòyardim.Bu gaplarimdan xafa bòlmang,bor gap bu.Xulosam shuki, Allohim shoshmaydi,biz bandalar esa shoshamiz. Vaqt òtishi bilan yaratganning Òzi haqiqatning yuzini ochib qòyarkan va uning yog’dusi qalblarimizni yorishtirib yuborarkan.Allohim hammamizni òz panohida asrasin!Yaratganga shukur!Duoyi-salom bilan muxlisangiz.