Jahonnoma

МАШҚЛАР

Шодмон кўрмоқликни истаб ҳар доим,
Қанча уринмайин қилмас кифоят,
Мени дўзахингга отгин Худойим,
Мамнун бўлар шунда рақибим шояд.

ХХХ

Сенинг фалсафангла дунёга боқсам,
Ҳар оним, ҳар сўзим, ҳар қадам-гуноҳ.
Дўзахга кирибда ўзимни ёқсам,
Барибир дастингдан қутулмам гумроҳ!

ХХХ

Сен менга жаннатдан гапирма эй шоҳ,
Калити қўлингда бўлса ҳам магар.
Менинг юрагимда яшаган илоҳ,
Дўзахга юборса юборсин агар!

ХХХ

Сени гувоҳликка ким чорлай олар,
Ахир Ҳақиқатдан қўрқасан ўзинг?!
Тилинг танглайингга ёпишиб қолар,
Олий маҳкамада чиқмагай сўзинг!

ХХХ

Йил кетиб, йил келар, севинамиз биз,
Осмон эса кўз ёш тўкади.
Ер кетиб, ер келар, тепинамиз биз,
Баҳор эса кўчат экади.

ХХХ

Золим эрур Бугун, қиличи ҳам қон,
Ҳатто кўкка сиғмас фиғону ноланг.
Бугунни унутсанг, Эртага ишон,
Эртанинг кўнглида улғаяр боланг.

Жаҳонгир Муҳаммад,
26 декабр, 2010 йил.
www.turonzamin.com

Filed under: Kundalik |