Jahonnoma

Мухолифат партиясига омад ёр бўлсин!

САВОЛ: Россияда Ўзбекистон Мухолифат Партияси ( ЎМП) тузилишини хушхабар дебсиз. Россия ҳудудида қандай қилиб ўзбек мухолифати партияси бўлиши мумкин? Мантиқ йўқку?(Салим).

ЖАВОБ: Биринчидан, нозўравон йўлни танлаган, мақсади демократик, халқ бошқарадиган ҳукумат қуриш бўлган мухолифат ҳаракатини тузишга уриниш шумхабар эмас, хушхабардир. Абдужабборнинг бу борадаги суҳбатини эшитгандим ва унинг демократия тарафдори эканлигига шубҳам йўқ.

Иккинчидан, агар бу партия тузилса ва рўйхатдан ўтса, демак мантиқ бор. Дунёнинг жуда кўп мамлакатларида “ўзбек мухолифат ҳаракати” шамсияси билан ташкилотлар тузилмоқда ва рўйхатдан ўтиб келмоқда ҳам.

Лекин Россия рўйхатдан ўтказадими, йўқми, гап ана шунда. Агар ўтказса, бу Ислом Каримовни бошқариш ёки уни истаган пайтда четлатиш учун “кўзир” бўлади.

“Нима бўлса бўлсин, Каримов кетсин” десангиз бу мантиқли иш. “Ўзбекистон золим режим қўлида турсин, лекин мустақил бўлсин” десангиз гапингизда жон бор. Бу нуқтаи назардан катта мантиқсизлик мавжуд.

Абдужаббор Исмоилни ватанпарвар ўзбек деб ўйлайман. Унинг мантиқсиз иш қилишига ишонмайман. Унинг имкониятлари катта.

Масалан, партиянинг марказини Швеция каби Авропа давлатларидан бирида рўйхатдан ўтказиб қўйиши мумкин. Бу жуда осон иш. Кейин қолган ҳамма ишни Россияда олиб борса бўлади. Асосий бўлимини Россияда очса ютади, ютқазмайди. Ўшанда Каримов режимининг битта имоси ёки ён бериши билан ФСБ бу партияни ёполмайди. Унинг “Бирдамлик”даги фаолиятидан тажрибаси бор.

Нима бўлганда ҳам бугун демократик бир ҳаракатга каттта эҳтиёж сезилмоқда. Ўзбекистонда мухолифат бўшлиғи мавжуд. Абдужаббор укамиз ва сафдошларининг бу уринишлари ана шу эҳтиёждан келиб чиқади. У ташаббускор, изланувчан, ақлли йигит ва мантиқли бир йўлини топади деб ўйлайман. Балки аллақачон топган ҳам бўлиши мумкин. Унга омад ва муваффақият ёр бўлсин!

Ж.М.

Filed under: Savol-Javob |